.png)
بەگوێرەی راپۆرتی گەیشتوو بە رێکخراوی مافی مرۆڤی هەنگاو، لە رۆژانی رابردوودا ئیدارەی ئیتلاعاتی شنۆ دوو خوشکیان بەناوەکانی "هاجەر ئەرسزادە" تەمەن ٤١ ساڵ و " کولسووم ئەرسزادە" تەمەن ٣٨ ساڵیان بانگ کرد و ماوەی هەشت کاتژمێر لێکۆڵینەوەیان لێ کردن و ئازار و ئەشکەنجەیان داون.
بە وتەی سەرچاوەیەکی نزیک لە بنەماڵەی ئەرسزادە، هێزەکانی ئیدارەی ئیتلاعاتی شنۆ لە ساڵانی رابردوودا بەردەوام ئەو دوو خوشکەیان بانگ کردووە و داوایان لێ کردوون کە گوشار بێنن بۆ براکەیان کە لە وڵاتی نوروژ ڕۆژنامەنووسە واز لە چالاکییەکانی بهێنێت.
سەرچاوەکە کە بە هۆکاری ئەمنییەتی نەیویست ناوەکەی ئاشکرا بکرێ لە درێژەدا وتی: “ دوایین جارێ کە ئەو دوو خوشکە بۆ ئیدارەی ئیتلاعات بانگ کراون داوایان لێ کراوە تا نووسراوەیەک واژۆ بکەن، ئەوانیش لەو کارە خۆیان بواردووە و بەو هۆیەوە کەوتوونەتە ژێر ئازار و ئەشکەنجەی ئیتلاعات بە شێوەیەک کە باسک و دەستی هاجەر تووشی برینی قورس بووە کە لەو وێنانەی بۆ هەنگاو هاتووە ئاسەواری شین بوونەوەی بە دەستیەوە دەبینرێت.”
سنار ئەرسزادە تەمەن ٣٩ ساڵ و خەڵکی شنۆ، ساڵی ٢٧١١ (٢٠١١) وەک پەنابەر چۆتەوە وڵاتی نوروژ و لە رۆژنامەکانی Friheten, Radikal portal و Utrop چالاکی هەیە و رووداوەکانی کوردستان لەم رۆژنامانە رووماڵ ئەکات. ناوبراو هەروەها ساڵی ٢٠١٥ یەکەمین کتێبی خۆی بە ناوی "هەتاوی تاریک لە سەر ئاسمانی کۆڵانە تەنگەکان" بڵاو کردۆتەوە و کتێبی دووهەمیشی ئامادەی چاپ و بڵاوبوونەوەیە.
.jpeg)
هیچ نظری موجود نیست:
ارسال یک نظر